Vijojnë replikat mbi debatin për dosjet e bashkëpunëtorit të ish-Sigurimit të Shtetit me inicialet I.M, për të cilin Autoriteti i Dosjeve pretendon se është ish-presidenti Ilir Meta.
Sekretari i Përgjithshëm i Partisë së Lirisë, Tedi Blushi i është drejtuar kryeministrit Edi Rama me disa pyetje, duke e akuzuar atë se i ka shërbyer Sigurimit të Shtetit.
“PESË PYETJE PËR EDI.K.R APO EDVIN KRISTAQ RAMËN DHE NJË SQARIM.
– Edi.K.R apo Edvin Kristaq Rama, a ke marrë rrogë apo honorare nga Sigurimi i Shtetit për punën që kryeje në revistën e këtij organi “Në shërbim të popullit”?
– Kush të gjeti punë në revistën e Sigurimit “Në shërbim të popullit” dhe në këmbim të çfarë?
– Çfarë të lidh ty me spiunen “Neta” që karikaturove në revistën e Sigurimit?
– A i ke ofruar Sigurimit ndonjë shërbim EKSTRA në 3 nëntor 1988. Kush ishte përkthyesi dhe çfarë të lidh ty me dosjen “Scavolini”? Po raportin ti e shkruajte?
– Kush është spiuni i faktuar N.L dhe a je i sigurt që nuk re në kurthin e ‘Radio Lojës’?”
Po ashtu, Blushi hedh poshtë pretendimet e Ramës që kryetarja e Autoritetit të Dosjeve, Genta Sula, është propozuar nga vetë ish-presidenti Meta.
“Karikaturisti me pagesë i Sigurimit të Shtetit, Edi.K.R apo Edvin Kristaq Rama mashtron rëndë kur pretendon se kryetaren e Autoritetit të Dosjeve ia ka propozuar Meta. Të gjithë e dinë se ajo ka qenë Zëvendësministre e Veliajt (djali i instruktore Shpresës), e preferuara e tij dhe e Ramës. Për më tepër, që karikaturisti me pagesë i revistës së Sigurimit “Në shërbim të popullit”, e di më mirë se kushdo që takimet apo bisedat për të cilat pretendon janë të dokumentuara. Gjithsesi nuk ka më vend për justifikime dhe alibi. Ajo që ka ndodhur është shumë e rëndë dhe Rama është përgjegjësi kryesor që ka urdhëruar manipulimet dhe falsifikimiet. Ka shumë gjëra që kanë çmim. Por kurrë Dinjiteti dhe Nderi. Djali i Netës i di shaka këto. Më keq për të dhe tarallakët që e ndjekin në këtë marrëzi! BOLL U FSHEHE PAS FUSTANIT TË GRAVE DHE TË MAMIT! PËRGJIGJU TANI!”