Kryetari i LZHK-së, deputeti Dashamir Shehi foli për rritjen e pensioneve. Shehi tha gjatë fjalës së tij në Kuvend, se propozimi i kryeministrit Edi Rama për subvencionimin e pensionistëve për Vitin e Ri, është një tallje me ta, pasi duket si një donacion për gjel deti. Ai tha gjithashtu se skema e propozuar nga LZHK, do ta çojë pensionin minimal në 30 mijë lekë të reja dhe do i nxjerrë të moshuarit nga varfëria.
Pjesë nga fjala
Që buxheti i 2025 është më i madh e më i rritur, jemi krenarë për këtë punë. E për këtë arsye unë po ju propozoj këtë, duke marrë shkas edhe donacionin që dëgjova nga kryeministri për pensionistët, për fundvitin. Një lloj donacioni është ky, ky bëhet për gjelin e detit ky i fundvitit.
Pastaj tha do të bëjmë edhe një të pranverës, ai do jetë për ballokumet. Duke i lënë mënjanë këto humore, unë them hajde bëjmë një shportë të madhe subvencioni, e dhimbshme për buxhetin, por e domosdoshme, prej rreth 300 milionësh, për të subvencionuar të gjithë pensionet që janë nga 200 mijë lekë e poshtë. Kjo nuk bëhet ashtu si tha kryeministri.
300 milionë, 160 milionë e nxjerrim duke hequr 10 % nga investimet publike prej 1.6 miliardë. Në buxhetin faktik të vitit 2023 mungonin 160 milionë që nuk ishin investuar. E njëjta gjë edhe këtë vit, i marrim 160 milionë. 55 milionë i ka parashikuar vetë qeveria te buxheti, 16 milionë për indeksim, 35 bilionë për bonusin e fundvitit. 90 milionë po i marrim borxh në tregun e brendshëm dhe ja ku u bë një shportë 300 milionëshe. Kjo do të jetë për një dekadë. Çdo vit kjo shportë do zvogëlohet me 10 %.
Vetëm kështu do të shpëtojmë nga mizerja, nga mbijetesa për bukë me qindra mijëra qytetarë shqiptarë. E kemi për detyrë ta bëjmë këtë. Nuk ka nevojë për skema të tjera pensionesh. Kush thotë do rregullojmë skemën, është një gënjeshtër të madhe, sepse skema nuk nxjerr asgjë. Ia kam dorëzuar edhe Komisionit të Ekonomisë këtë propozim. Buxhetin nuk mund ta marrin vetëm koncesionarët, por edhe qytetarët.