Përfaqësuesi i Lartë i BE-së për Punët e Jashtme dhe Politikën e Sigurisë, njëheresh edhe zëvendëspresidenti i Komisionit Evropian, Josep Borrell ka vizituar këtë të martë Tiranën ku është takuar edhe me kryeministrin e vendit tonë, Edi Rama.
Gjatë fjalës së mbajtur në konferencën e përbashkët në shtyp me kryeministrin Rama, Borrell është shprehur se Shqipëria tashmë i ka përmbushur kushtet dhe është plotësisht e gatshme që të integrohet në Bashkimin Europian. Ai tha se vendi ynë do të ketë mbështetjen e tij deri në fund të këtij rrugëtimi.
Gjithashtu, ai është shprehur mes të tjerash se është e rëndësishme që Evropa të jetë e bashkuar.
“Shqipëria i ka përmbushur kushtet për hapjen e negociatave dhe unë e mbështes punën që bëhet dhe do të mbështes ecurinë e hapjes së negociatave. Më lejoni të them se unë dhe kolegët e mirë dhe komisioneri Oliver jemi të përkushtuar që ka të bëjë me stabilitetin rajonal dhe sot më shumë se kurrë duhet që të përkrahim evropianët e bashkuar. Nuk mund të them diçka që mundtë më angazhojë mua se nuk varet prej meje por ne po bashkëpunojmë sa më shumë të jetë e mundur”, ka thënë Borrell.
Gjithashtu Borrell ka përmendur dhe protestat e zhvilluara në lidhje me rritjen e çmimeve në vendin tonë ku është shprehur se kjo është pasojë e luftës.
Sipas tij kjo është një ndër armët që po përdor Rusia, ndaj të gjithëve që ka çuar në ndalimin e eksporteve të disa mallrave.
“Rritja e çmimeve nuk është vetëm një problem në Shqipëri por janë pasoja të luftës, dhe kjo s’ka lidhje me sanksionet por është një proces që ka nisur më parë me rritjen e energjisë, naftës pasi është një varësi e të gjithëve ne, pasi Rusia tashmë po na e përdor dhe si armë. Kjo është pasojë e luftës, e ndalimit të eksporteve, rritjes së produkteve që na prekin të gjithë ne në Evropë, Ballkanin Perëndimor etj”, deklaroi Borrell.