Operatori i Shpërndarjes së Energjisë Elektrike, këtë të premte i ka ndërprerë energjinë elektrike xhamisë së Bulqizës. Mësohet se ndërprerja e energjisë elektrike ka ndodhur fill pas faljes së namazit të xhumasë. Kjo është e disata herë që xhamisë i ndërpritet energjia elektrike dhe kjo për shkak të një debie ndaj OSHEE-së, prej viteve 2010-2011.

Në vitin 2010 banorët e një pallati në Lagjen e Re në Bulqizë, që në atë kohë sipas institucioneve shtetërore rrezikonte shembjen, për një periudhë 18 mujore janë akomoduar në ambientet e kësaj xhamie. Pallati që rrezikonte shembjen, pak muaj më vonë u privatizua nga Bashkia Bulqizë.

Familjet e akomoduara në ambientet e xhamisë, konsumuan energji elektrike me vlerë 600.000 lekë, që sot bashkë me kamatat, debia ndaj OSHEE është dyfishuar.

Myftiu i Bulqizës, Sejdin Strazimiri sqaroi se ky borxh për energjinë elektrike të konsumuar nga familjet e strehuara në ambientet e xhamisë, duhej të paguhej nga bashkia, kjo sipas një kontrate verbale të bërë në atë kohë publikisht edhe në media.

Për Strazimirin, është e pa pranueshme që energjia elektrike për një xhami të ndërpritet ditën e premte, në kohën kur besimtarët luten në xhami.

“Ne si Myftini shprehim indinjatë ndaj bashkisë Bulqizë dhe ndaj OSHEE-së. Ka disa herë që na i presin dritat për një borxh që në fakt nuk është i xhamisë por i bashkisë. Të bësh mirë në këtë vend qenka shumë e vështirë. Ne strehuam 13 familje, bashkia premtoi publikisht që do të paguante çdo shpenzim mirëpo asnjëherë nuk u përgjigj.” tha ai.

PËRGJIGJU

Please enter your comment!
Please enter your name here