Drejtori teknik i Burrelit Klevis Gjoka tha se dy vitet e fundit është treguar kujdes i veçantë për sportin e futbollit.
Skuadra është drejt konsolidimit të plotë, me lojtarë cilësorë dhe që premtojnë sukses gjatë sezonit të ardhshëm futbollistik.
“Andri Stafa, Kleidis Branica, Luiz Paolo Junior, Ekemi Efijong, Kled Dibra, Samet Hepaj, Brilant Hasaj, Marko van basten Çema, Klajdi Kryemadhi, Henrik Bruka, David Gjinollari do të jenë pjesë e skuadrës tonë, tha Gjoka. Kemi mbyllur federimet në bashkëpunim me trajnerin Patushi dhe administratorin Ballabani dhe jemi shpresëplotë se kemi bërë zgjedhjet e duhura.”
Investim i rëndësishëm është ngritja për herë të parë e akademisë së futbollit në qytetin e Burrelit. Ish futbollistët dhe trajnerët me përvojë Renato Hoti, Sajmir Dika dhe Alfred Stafasani do të drejtojnë gjatë sezonit të ri ekipet U-19, U-17 dhe U-13.
“Bashkia, shprehet Gjoka, e mbajti premtimin për ngritjen e akademisë së futbollit. Është e para herë që mendohet seriozisht për përgatitjen e brezave të futbollistëve autoktonë. Me siguri brenda pak viteve do të vijnë rezultatet e dëshiruara”, shtoi drejtori teknik i Burrelit.
Me shumë interes për futbollin matjanë janë investimet serioze që po kryhen në stadiumin “Liri Ballabani” dhe aneksin e impiantit sportiv. Ka nisur po ashtu puna për vendosjen e 2000 stolave për tifozët burrelas. Eshtë investuar sakaq për dhomat e zhveshjes, dushet, dhomat e gjyqtarëve, koridoreve, veshjet e lojtarëve, pajisjet për stërvitje, etj.
