Socialistët e Matit festuan dje 35-vjetorin e themelimit të degës lokale të Partisë Socialiste, në praninë e qindra anëtarëve dhe mbështetësve, ish-kryetarëve të PS-së ndër vite, ish-deputetëve, si dhe ish-kryetarëve të bashkive e komunave nga viti 1992 deri në vitin 2026.
Në fjalën e tij përshëndetëse, kryetari i PS Mat, Hasan Pasha, u shpreh: “Sot nuk jemi mbledhur vetëm për të kujtuar një datë të rëndësishme. Jemi mbledhur për të nderuar një histori sakrifice, përkushtimi dhe besimi; një rrugëtim që nisi në kohë të vështira dhe që vazhdon edhe sot me përgjegjësi ndaj qytetarëve, zhvillimit dhe së ardhmes së vendit tonë.”
Pas shfaqjes së një dokumentari që pasqyronte me detaje rrugëtimin e socialistëve të kësaj treve ndër vite, të pranishmit ndanë kujtime të veçanta dhe përcollën mesazhe bashkimi, përgjegjësie dhe besimi për të ardhmen e kësaj force politike.
Ulsi Manja, Agron Malaj, Luan Rama, Altin Bojni, Valbona Kola, Rexhep Kërçiku, Shkëlzen Gjoka, Armando Gjini, Ali Zeneli, Ramiz Palluçi, Adelina Farrici, Anila Stafasani dhe Regi Vaçi theksuan se, 35 vite më parë, shumë burra dhe gra të Matit zgjodhën të besonin te demokracia, te ndryshimi dhe te një Shqipëri më e mire, një besim që vazhdon të mbetet i fortë edhe sot.
