Asgjë nuk ka mbetur nga djegja e 5 shtëpive në lagjen “Pjetër Budi” në qytetin e Burrelit. Banesat që ndodheshin ngjitur me ish hotelin e Uzinës së Ferrokromit janë shkrumbuar totalisht.
Përpjekjet e bashkisë Mat, ushtrisë, policisë mundësuan shpëtimin e 16 banorëve si dhe nuk lejuan përhapjen e zjarrit pranë një pike karburanti, një magazine të bimëve medicinale, pallatit të UFK-së dhe banesave të tjera përreth.
Policia lokale ka nisur hetimet për zbardhjen e plotë të ngjarjes, ndërsa bashkia Mat ka ngritur grupet e konstatimit të dëmeve të shkaktuara.
Deri në këto momente mendohet se shkak i zjarrit ka qenë një shkëndijë elektrike në banesën e S. Skilës dhe përhapja me shpejtësi edhe në 4 banesat e tjera, të cilat ishin nën një çati.
Zyrtarë të bashkisë Mat pohuan se grupet e verifikimit janë në terren dhe po kqyrin të gjitha dëmet e shkaktuara. Po ashtu po merren masa për strehimin dhe furnizimin e këtyre familjeve me ushqime.
