Zonat historike me tradita të qytetit të Burrelit, po rilindin falë investimeve që po kryhen në infrastrukturën e tyre, duke i dhënë një tjetër vlerë arkitekturës së qytetit dhe turizmit në rritje, kjo falë edhe investimeve të rëndësishme të Rrugës së Arbrit e Tunelit të Murrizit, që e kanë sjellë më afër veriun e bukur të vendit.
Kryeministri Edi Rama, njëkohësisht kryetar i PS-së ishte sot në Burrel, ku fillimisht inspektoi sheshin “Ahmet Zogu” dhe lulishten “Geraldinë”, një nga zonat historike që po rilind nga e para. Kurse kryetari i bashkisë së Matit, Agron Malaj, tha se po bëhet një rivitalizim i gjithë pjesës, dhe se do të bëhet park.
“Po bëhet një rivitalizim i gjithë pjesës, do bëhet park. Këtu s’do ketë më parking makinash. Këtu kemi bërë dhe unazën e vogël. Ka disa vepra shumë të bukura, me shatërvanë, stola për të moshuarit, me ambiente relaksuese. Ky guri që vendoset është nga zona, do kemi pamje goxha të mira. Godinën e kemi bërë një restaurim pjesor. Kjo është që në kohën e Zogut dhe kemi dhe një projekt që do ta rivitaliozjmë të gjithë, komplet dhe si godina rreth sheshit”,-tregoi Malaj.
