Ish ministri për Evropën dhe Punët e Jashtme Ditmir Bushati, në cilësinë e kryetarit të Delegacionit parlamentar të Shqipërisë në OSBE, është takuar me presidentin e Asamblesë Parlamentare të OSBE-së, George Tsereteli. Takimi është zhvilluar në kuadër të punimeve të AP të OSBE-së që po zhvillohen në Vienë.
Gjatë takimit diskutuan për forcimin e kontributit të Shqipërisë në transformimin dhe ndërtimin e institucioneve demokratike në OSBE. Të dy bashkëbiseduesit ranë dakord për të punuar ngushtësisht teksa Shqipëria përgatitet për kryesimin e OSBE-së në 2020.
Një ditë më parë Bushati u takua me Sekretarin e Përgjithshëm të OSBE-së Tomas Greminger. Në statusin e tij në rrjetet sociale ish ministri tha se është mjaft e rëndësishme vendosja e interesit kombëtar mbi politikat partiake për këtë përgjegjeësi që merr përsipër vendi ynë, kryesimin e OSBE-së.
Vendimi u dha në takimin e 25-të të Këshillit Ministror të OSBE-së në Milano, në dhjetor të vitit të kaluar. Gjatë vitit 2019 Shqipëria është në Trojkën e OSBE, bashkë me Italinë si paraardhëse dhe Sllovakinë që mban kryesimin e këtij viti.