Për ish-ministrin e Jashtëm Ditmir Bushati zgjedhjet në SHBA duhet të jenë mësim dhe për Shqipërinë se si realizohen ato në kushte pandemie.
Duke folur për Zërin e Amerikës si pjesë e misionit vëzhgues të OSBE-së, Bushati tha se zgjedhësve iu ofruan mënyra të ndryshme votimi çka e bën një vend specifik e të veçantë SHBA-në.
“Gjëja kryesore që i dallon SHBA-ta nga demokracitë perëndimore është fakti që institucionet janë mjaft të qëndrueshme dhe solide, dhe kufizojnë ekzagjerimet që vijnë nga jeta politike. Si ka vepruar e gjithë trupa zgjedhore është një mësim që duhet të nxjerrim me shumë kujdes. Zgjedhjeve u ofrua mënyra nga më ndryshmet për te votuar, që i bën specifik dhe të veçantë SHBA-të. Në Shqipëri parafrazojmë simptomat me krizat e politikës dhe harrojmë që besimi i zgjedhësve te vota është e rëndësishme”, tha Bushati.
Për të administrimi i procesit duhet të jetë një mësim për vendet e tjera, përfshi dhe vendin tonë.
“Mënyra si është administruar procesi, dëshmojnë për një besim që zgjedhësit kanë tek institucioni i votës. Për gjithë vendet që do ikin në zgjedhje, përfshirë Shqipërinë, do nxjerrin mësime si dihet të menaxhohet procesi zgjedhor në kushte pandemie”, tha ai.
Për ish ministrin e Jashtëm SHBA nuk është fytyrë e krizës së demokracisë. “Përkundrazi. Mjafton të shohësh mundësitë që u ofrohen njerëzve për të votuar dhe jo veç ditën e zgjedhjeve, mënyrën e administrimit të procesit në mënyrë të shkëlqyer nga profesionistë e jo militantë politik në qendrat e votimit në kushtet e pandemisë, pjesëmarrjen e lartë në zgjedhje e sidomos pjesëmarrjen e lartë të votuesve për herë të parë. Janë tregues i besimit që njerëzit kanë te demokracia. Ne gabojmë kur analizojmë sfidat me të cilat përballet demokracia vetëm me sjelljet e ekzagjeruara të politikës”, tha ai.