Kryeministri Edi Rama ironizoi nga Durrësi opozitën shqiptare dhe vendimin e saj për të zgjedhur rrugën e protestave në vend të pjesëmarrjes në zgjedhje. “Oerd Bykylbashi tha nuk hyj në zgjedhje por si të hysh si jo njësoj do të jetë. Do të bësh guidën turistike për turistët e Vorës, Kamzës e Shkodrës. Mbas teje Oerd, mbas Lulit mos të flasim për fallxhoren, nuk vijnë demokratët e Durrësit. Ne zgjedhjet do i bëjmë si me ata si pa ata”, – u shpreh Rama.
Por nuk ka vonuar reagimi I ish-deputetit demokrat Oerd Bylykbashi. Përmes një postimi në Facebook, Bylykbashi i ka kujtuar Ramës betejat politike në zgjedhjet e mëparshme, ndërsa i ka kërkuar atij që të japë dorëheqjen dhe të lejojë zgjedhjet pa atë në krye. “Eh mer artist! Paska fol artisti nga Tirana. O artist, të kujtohet 2009 kur thoje: Si ma hodhe që mblodhët me shume vota me koalicion? I madh ishe, kujtoje se koalicioni i madh duhej vetëm për kohë televizive. Koalicioni mblodhi vota, jo kriminelët që mbledh ti. Po 2011 kur të nxorëm nga zyra të kujtohet? Të prishëm planet e kullave. Madje doje të zhdukje edhe ato 300 votat që socialistet kishin hedhur për ty, por i kishin hedhur në kutitë e gabuara. Ti nuk doje të numëroheshin edhe votat e tua, i bëre hasha, se doje të shpalleshe fitues patjetër vetëm me 10 votat e rezultatit paraprak. Ne t’i gjetëm ne kuti, i numëruam për ty një për një. Dhe ti humbe. Kur je artist mos bëj si jurist! Hidhi armët që të jep pushteti, lëri bandat dhe dil në shesh barabartë dhe të shohim si ikën duke kuisur. Hë artist, ashtu e sheh sa të vlejnë bojrat e ujit që mban mbi tryezë”, shkruan Bylykbashi.