Rreth orës 11:00 të kësaj të shtune, një situatë emergjente është krijuar pas çarjes së kanalit kryesor “Naum Panxhi”, duke shkaktuar vërshimin e ujit dhe inerteve dhe bllokimin e aksit rrugor Elbasan-Cërrik.
Për menaxhimin e situatës dhe lehtësimin e qarkullimit, ekipet e Agjencisë së Shërbimeve Publike Rurale, në bashkëpunim me Policinë Rrugore, kanë ndërhyrë duke devijuar automjetet në rrugë alternative.
Sipas informacioneve nga terreni, prej më shumë se dy orësh strukturat e ASHPR-së janë në komunikim të vazhdueshëm me Bordin e Kullimit, në inventarin e të cilit ndodhet kanali kryesor “Naum Panxhi”.
Aktualisht, Agjencia e Shërbimeve Publike Rurale ka angazhuar mjetet dhe punonjësit e saj në terren për pastrimin e rrugës nga uji dhe inertet.
Ndërkohë, si masë emergjente për të shmangur përmbytjet e mëtejshme në zonat përreth, janë hapur të gjitha kanalet dytësore vaditëse.
Pritet ndërhyrja e plotë e Bordit të Kullimit për stabilizimin përfundimtar të situatës dhe rikthimin e normalitetit në aksin Elbasan-Cërrik.