Ministrja për Europën dhe Punët e Jashtme Olta Xhaçka ka pritur ministren federale për BE të Austrisë, Karloine Edstadler. Gjatë fjalës së saj në konferencën e përbashkët për shtyp ministrja Xhaçka tha se Shqipëria po ndjek diskutimet në BE për lehtësimin e kufizimeve përsa i përket certifikatës së vaksinimit.
Ministrja shprehu gjithashtu vlerësim për mbështetjen e Austrisë pas tërmetit dhe gjatë pandemisë. Austria shpërndau në vendet e Ballkanit Perëndimor 651 mijë vaksina, tha ajo duke shprehur nevojën për lehtësim të lëvizjes së qytetarëve të rajonit.
Përsa i përket integrimit, ministrja tha se bashkëbisedueset gjatë takimit ranë dakord se anëtarësimi i vendeve të Ballkanit Perëndimor në BE duhet të përshpejtohet. Shqipëria tha Xhaçka ka rezultate të prekshme dhe të qëndrueshme në fushat kryesore të identifikuara.
“Kemi plotësuar të gjitha kushtet e vendosura nga Këshilli për mbajtjen e Konferencës së Parë Ndërqeveriatre. Radha e BE për të vlerësuar arritjet tona konkrete, duke nisur bisedimet e anëtarësimit. Rigjallërimi i perspektivës së integrimit evropian të rajonit, instrumenti më efikas për, forcimin e stabilitetit në Ballkanin Perëndimor”, tha ministrja Xhaçka.