Gjykata Supreme e Kosovës ka hedhur poshtë një ankesë të parashtruar nga dy anëtarë të Lëvizjes Vetëvendosje kundër vendimit të Panelit Zgjedhor për Ankesa dhe Parashtresa për ta urdhëruar KQZ që ta certifikojë Listën Serbe për pjesëmarrje në zgjedhjet lokale.
Gjykata argumenton se “duke u nisur nga fakti se ankesa ndaj vendimit të PZAP-së në Gjykatën Supreme është parashtruar nga Sami Kurteshi dhe Alban Krasniqi në cilësinë e anëtareve individualë të KQZ-së, ata nuk kanë legjitimitet, pasi nuk janë palë të drejtpërdrejta sipas vendimit të PZAP-së”.
PZAP-ja urdhëroi javën e kaluar komisionin zgjedhor ta certifikojë partinë më të madhe të serbëve në Kosovë, e cila gëzon mbështetjen e Beogradit zyrtar, pak ditë pasi asaj iu mohua regjistrimi për pjesëmarrje në zgjedhjet e 12 tetorit. Dy anëtarët e LVV-së në KQZ, Kurteshi dhe Krasniqi, ishin të vetmit që votuan kundër certifikimit të kësaj partie.