Këtë të martë, Partia Socialiste pritet të mbledhë Grupin e saj Parlamentar e cila është programuar të fillojë në orën 10:00. Mbledhja do të mbahet në ambientet e selisë rozë dhe gjatë saj, deputetët do të depozitojnë propozimet e tyre për emrin e presidenti të ri.
Në fakt, socialistët kanë ngritur një grup pune i cili do të zhvillojë konsultimet me grupet e tjera parlamentare në Kuvend. Kjo bëhet me qëllimin për të përzgjedhur një emër konsensual, ndërsa të mërkurën thuhet se do të ulet në një tryezë me opozitën.
Për këtë çështje, Partia Socialiste ka mandatuar kreun e grupit parlamentar të saj, Taulant Ballën, Elisa Spiropalin dhe Damian Gjiknurin në grupin e punës, që do të menaxhojnë procesin për zgjedhjen e presidentit të ri të vendit. Kujtojmë se Ilir Metës i mbaron mandati i presidentit më 24 korrik.