Disa njerëz e anashkalojnë vaktin e mëngjesit në një përpjekje për të humbur peshë, por kjo sjellje ka më shumë të ngjarë të shkaktojë shtim në peshë sesa humbje peshe. Shmangia e mëngjesit është e lidhur ngushtë me zhvillimin e obezitetit. Studimet tregojnë se fëmijët, adoleshentët dhe të rriturit që janë mbipeshë dhe obezë, kanë tendencën që ta anashkalojnë këtë vakt të rëndësishëm.
Sipas studimeve, shmangia e vakteve, sidomos mëngjesit, në fakt mund ta bëjë kontrollin e peshës më të vështirë. Ata që nuk konsumojnë mëngjesin, priren të konsumojnë më shumë ushqim se zakonisht në vaktet e tjera,disa kanë tendencën të përdorin snack-e dhe fast food-e me plot kalori për të larguar urinë. Disa studime sugjerojnë se njerëzit kanë tendencë për të grumbulluar më shumë dhjam, kur ata hanë më pak vakte por të mëdha në sasi, se sa kur ata konsumojnë të njëjtin numër të kalorive në vakte më të vogla e të shpeshta.
Lënia mënjanë e mëngjesit,shumë adoleshentëve mund ti duket si një mënyrë e përkryer dhe logjike për të ulur numrin e kalorive të marra dhe në këtë mënyrë të bien në peshë. Është e rëndësishme sidomos për nënat që të edukojnë fëmijët e tyre në lidhje me rëndësinë e vaktit të mëngjesit dhe rolin që luan në ruajtjen e një shëndeti të mirë dhe në parandalimin e obezitetit.
Studimet tregojnë se fëmijët që nuk hanë mëngjes , vonohen dhe mungojnë në shkollë më shpesh se fëmijët që hanë mëngjes rregullisht. Të përgatisësh një mëngjes të mirë mund të jetë dicka e shpejtë dhe e lehtë,si psh të hedhësh qumësht mbi drithëra . Koha e investuar për mëngjesin është shumë më e vlefshme se disa minuta shtesë gjumi që ju mund të merrni duke anashkaluar vaktin e mëngjesit.
Duke furnizuar trurin dhe trupin me ushqim, ju do të keni më rendiment në cdo gjë që bëni. Nëse mendoni se ju dhe fëmijët tuaj nuk arrini dot të hani mëngjes në shtëpi, paketoni një natë para dicka që mund të hahet në rrugën për në shkollë ose punë.