Nga Alfred Peza /
Historia na mëson se Mosbindjet Civile janë lëvizje të qytetarëve kundër elitave politike. Ndaj asnjëra prej tyre nuk organizohet apo udhëhiqet nga parti apo liderë për qëllime a përfitime politike direkt prej tyre, si në rastin aktual të PD dhe LSI. Këto lëvizje bëhen prej njerëzve, drejtuar nga njerëzit, me qëllim që të përfitojnë njerëzit.
1.- “Salt March” (Marshimi i Kripës)- Këtë emër mori lëvizja në Indi kundër kolonive britanike për të kundërshtuar ligjet e monoplit të kripës. Nisi në mars të 1930, duke shkaktuar një valë të mosbindjes civile, në një marshim që synonte prodhimin e kripës dhe transportin e saj, pa paguar taksat. Britanikët e shtypën me forcë duke arrestuar qindra persona. Lëvizja nuk arriti të gjente edhe mbështetjen e muslimanëve të Indisë.
2.- “Fushata e Extremaduras”- Në Spanjë gjatë zgjedhjeve të vitit 1936, kandidatët e Frontit Popullor kishin premtuar reforma të shpejta mbi tokat. Pa pritur që qeveria të mbante premtimet, fshatarët e papunë filluan të zaptonin pasuri të mëdha duke nisur me 3,000 ferma në provicën e Badajozit, në të cilat u vendosën qindra fshatarë.
3.- “Depresioni i madh”- Në SHBA të viteve ’30, punëtorë të fushave të pambukut e minerave të qymyrgurit u ngritën kundër uljes së pagave e humbjes së vendeve të punës. Lëvizja u shtri edhe në fabrika, ku punëtorët thjesht qëndronin të ulur dhe refuzonin të lëviznin, si një mënyrë paqësore e të protestuarit.
4.- Çmontimi i sipërmarrjeve të padëshiruara- Linja e fast food-it “McDonalds” u mirëprit në shumë vende të Europë, kur nisi të shtrihej në vitin 1970. Franca ishte kundër. Rrjeti tentoi të hapte një degë në Millau më 1999, duke nxitur reagimin e José Bové, një fermer luftarak, i cili e çmontoi atë bashkë me mbështetësit e tij, pak para se ajo të hapej.
5.- Mospagimi i taksës së votimit- Në qendër të Londrës dolën rreth 200,000 protestues. Policia, në mënyrë shumë të pazakontë, doli në anën e tyre. Strategjia e protestës ishte rezistimi me çdo kusht, refuzimi regjistrimit për taksat, kundërshtimi i urdhërave dhe në fund refuzimi i pagesës.
