Një tjetër ngërç për Kushtetuesen duket se do ndodhë, në një kohë që kreu i shtetit Ilir Meta i ka dërguar një letër Këshillit të Emërimeve në Drejtësi që të pezullojë procesin.
Sipas letrës që disponon A2CNN, Presidenti i ka kërkuar KED që të pezullojë procesin të paktën për institucionin e tij. Sipas Presidencës duhet të vepronte fillimisht Kuvendi dhe më pas Presidenti.
Në këto kushte, kreu i shtetit nuk e ka ushtruar të drejtën për të zgjedhur anëtarin e dytë të Gjykatës Kushtetuese, dhe tashmë i ndodhur në kufijtë e afatit bën këtë kërkesë.
A2CNN thotë se nëse KED nuk vepron pas shkresës së Presidentit dhe deri në mesnatë nuk dërgon një emër, atëherë Arta Vorpsi zgjidhet automatikisht anëtare e Gjykatës Kushtetuese, pasi është e para në listën me pikëzim hartuar nga KED.
Por zonja Vorpsi është e para edhe në listën prej së cilës do të duhet të zgjedhë Kuvendi. Kjo e ndërlikon situatën, pasi Kuvendi duhet të miratojë me 84 vota njërën nga dy kandidaturat e tjera, Elsa Toska dhe Fiona Papajorgji. Nëse kjo nuk ndodh, procesi do të riniste edhe një herë nga e para, pasi Vorpsi nuk mund të zgjidhet më si anëtare e Kuvendit.
Për këtë arsye, me kërkesë të shumicës, seanca për votimin e anëtarit të Gjykatës Kushtetuese është përshpejtuar për datën 11 nëntor, nga 13 që ishte parashikuar, në mënyrë që të sigurohet një numër sa më i madh votash për njërën prej dy kandidaturave të tjera, bën të ditur A2CNN.