Sipas mediave britanike, Grupi i drejtuar nga bashkëpronari i Los Angeles Dodgers, Todd Boehly është favorit për blerjen e Chelseat. Prandaj, proçesi i gjatë i vlerësimit të ofertave duket i marrë fund, me bankën e New York – Raine Group, që ka zgjedhur grupin Boehly, për të nisur negociatat ekskluzive për mbylljen e marrëveshjes.
Një zëdhënës i konsorciumit Boehly nuk pranoi të komentojë të premten, por presidenti dhe CEO i Eldridge Industries mendohet se ka ndërmarrë një hap të rëndësishëm dhe me gjasë vendimtar. Boehly është në konsorcium me bashkëpronarin e Dodgers Mark Walter, biznesmenin britanik Jonathan Goldstein, miliarderin zviceran Hansjorg Wyss dhe firmën amerikane të investimeve Clearlake Capital.
Chelsea shpreson të ketë një pronar të ri deri në fund të majit pasi trajneri Thomas Tuchel duhet të fillojë planifikimet për sezonin e ardhshëm. Për shkak të sanksioneve ndaj Abramovich, Tuchel nuk është në gjendje të ofrojë kontrata të reja për lojtarët aktualë ose të nënshkruajë me të tjerë.
Ky rast vjen po në ditën kur dukej i sigurt kalimi i Chelseat te shefi i gjigantit kimik Ineos, Jim Ratcliffe, i cili paraqiti një ofertë prej 4.25 miliardë paund (rreth pesë miliardë euro) për blerjen e Chelseat.
“Një ofertë britanike për një klub britanik,” tha kompania në një deklaratë, duke premtuar investime në Stamford Bridge si dhe për të afruar trajnerët dhe lojtarët më të mirë”. Problemi për Ratcliffe është se ai tashmë zotëron klubin e Nice dhe ekipin e çiklizmit, Ineos.
