Gazetari i familjes Berisha, Çim Peka ka kërcënuar kreun e SPAK, Altin Dumani, pas fletëthirrjes së SPAK për Sali Berishën dhe dhëndrin e tij, Jamarbër Malltezi, të cilëve të mërkurën do t’iu komunikohet zyrtarisht akuza për dosjen “Partizani”.
Në një postim në Facebook, Çim Peka kërcënon Dumanin, duke shkruar se kreu i SPAK do ketë fatin e Zani Çaushit, ish-kreu i bandës së Vlorës, i dënuar me burg përjetë.
“Dumani në rolin e Zani Çaushit te ‘97. Edhe fatin do e ketë të njëjtë”, shkruan Çim Peka.
Zani Çaushi është i dënuar me burgim të përjetshëm, si ish- kreu i një prej bandave në qytetin e Vlorës, gjatë trazirave të vitit 1997. Gjatë periudhës së viteve 1997-1998 u deklarua kundërshtar i Sali Berishës dhe u bë krah i djathtë i Komitetit të Shpëtimit të Vlorës.
Ai dhe banda e tij akuzohen për krime të rënda. Në Vlorë gjatë trazirave të vitit 1997, u formuan 5 banda. Tre prej tyre ishin rivale me atë të Zanit, Banda e Gaxhait, Banda e Kakamit dhe Banda e Pusit të Mezinit. Gjatë përplasjes me bandat e armatosura Zani Caushi ka humbur tre vëllezërit.
