COVID-19 është kthyer në një probem serioz dhe rrezik për vazhdimësinë e skuadrave në turnetë ndërkombëtarë, siç e tregon qartësisht historia me ekipet kosovare të cilat panë të eliminohen pa zbritur në fushën e lojës. Ndaj te Tirana, lajmi se testet e radhës kanë qenë negative, kanë gëzuar stafin dhe lojtarët bardheblu.
Ekipi i ishte ndënshtruar vazhdimisht testeve këto ditë, që kur nisi aventura europiane me transfertën në Gjeorgji, e njëjta gjë është përsëritur edhe pas kthimit në Shqipëri, ndërsa të gjithë ishin porositur që të evitonin kontakte me persona të tjerë jashtë familjeve të tyre, për të minimizuar rreziqet.
Sot, klubi ka marrë përgjigjet për testet e radhës nga autoritetet shëndetësore, të cilat konfirmuan se askush mes lojtarëve e stafit nuk ishte i infektuar me COVID-19. “Klubi i Futbollit Tirana pas kryerjes së tamponëve konfirmon se rezultatet e të gjithë personave mbi të cilët u krye kjo analizë, rezultuan NEGATIVE. Ekipi është gati për të zhvilluar sfidën e raundit të dytë kualifikues kundër FC Red Star. Pas përfundimit të seancës stërvitore te orës 19:00 siç ishte planifikuar, ekipi do të grumbullohet në hotel për të pritur të nesërmen e sfidës”, shkruhej në njoftimin e bardhebluve të cilët kësisoj do të kenë në dispozicion të gjithë lojtarët për sfidën e nesërme.