Prej ditësh tashmë bota po përballet më një rritje të shifrave të infektimeve me Covid-19, gjë që është duke krijuar një situatë aspak të sigurt dhe po ngjall frikën për kthimin e skenarëve të përpara verës ku sistemet shëndetësore shpesh ishin në kolaps ose shumë pranë kolapsit.
Varianti Delta, një mutacion i lokalizuar fillimisht në Indi, është duke ndikuar shumë në rritjen e infektimeve. Shtetet e Bashkuara kanë regjistruar vetëm ditën e djeshme 341 persona që kanë humbur jetën në luftën me koronavirusin, referuar të dhënave të Universitetit Johns Hopkins Numri i personave të vdekur nga COVID-19 në SHBA është rritur në 609.877. Ndërsa numri i të infektuarve që nga fillimi i pandemisë sipas të dhënave të universitetit, ka arritur në 34.230.391, me 52.985 raste vetëm ditën e djeshme. Një tjetër shtet që po përballet me shtim të infektimeve është Gjermania.
Kancelaria Angela Merkel është shprehur se rritja e numrit të infektimeve është me një ritëm goxha shqetësuese dhe i ka bërë thirrje qytetarëve të cilët janë ngurrues në marrjen e vaksinës, që të vaksinohen. Gjithsesi, shkalla e infektimit të Gjermanisë mbetet shumë e ulët krahasuar me disa vende të tjera evropiane, por ajo është rritur në mënyrë të vazhdueshme që kur arriti në 4.9 raste të reja javore për 100,000 banorë në 6 korrik.
Merkel gjithashtu u bëri thirrje gjermanëve që t’i përmbahen rregullave të distancimit dhe mbajtjes së maskave, por tha se të gjithë e dinë çelësin për të kapërcyer pandeminë, mënyra e vetme, është vaksinimi.