Mjeku i njohur pneumolog, Adrian Jorgji ka dhënë disa këshilla kur një pacient duhet të shqetësohet dhe menjëherë të kontaktojë mjekun.
I ftuar në emisionin “Kjo Javë”, ai ka shtuar se është e vështirë edhe në vlerësimet klinike të ndahet nëse një infektim është nga gripi, viroza e stinës apo edhe Covid-19.
“Për një temperaturë që zgjat pa pushim 6-7 ditë. Për një temperaturë që për 3-4 ditë ka ndaluar dhe rikthehet, për një kollë që në ditët në vijim përkeqësohet, kur shtohet rëndesa në gjoks, apo ndjesia e një jo frymëmarrje të mirë, kur ndjesia trupore shtohet. Këto janë arsye për të cilat që duhet të shqetësohemi”, tha mjeku.
Jorgji përjashtoi përdorimin e antibiotikëve, duke rekomanduar sa më shumë ushqime të plota, ndërsa u ndal veçanërisht tek supa.
“Nuk ka asnjë arsye, përveç ndonjë rasti të veçantë, por kjo duhet gjykuar nga ana klinike. Por nuk ka asnjë arsye. Virozat nuk shërohen me antibiotik. Ndërhyhet me antibiotik kur rastet ndërlikohen. Probiotiku më i mirë për mua janë ushqime të caktuara. Unë psh, supën po të kisha mundësi do e shkruaja në recetë, kos, ushqim të plotë. Supe jo me shumë yndyrë. Sepse yndyra shkakton çrregullime intesinela dhe përdorime bashkë me ilaçe sjell probleme intesinale. Prandaj thashë ushqime të plota, ashtu sic bëjmë për fëmijë të vegjël, pure, oriz, peshk të zierë, perime të ziera, por edhe lëngje”, tha mjeku Jorgji.