Këngëtarja e njohur shqiptare, Dafina Zeqiri, ka publikuar albumin e saj të shumëpritur, “Dafinë Moj”. Artistja ka treguar se kjo është një punë disa vjeçare në bashkëpunim me autorë të ndryshëm të muzikës. Albumi ka 14 këngë, 10 prej të cilave janë bashkëpunime me emra të njohur të muzikës. Kënga e parë e albumit mban të njëjtin titull, “Dafinë Moj” dhe është një duet me nënën e saj, Melihate Zeqiri, e cila ka qenë edhe personi nga i cili ajo ka “trashëguar” talentin për t’u marrë me muzikë. Po ashtu, artistja ia ka dedikuar albumin të ëmës.
Të tjera bashkëpunime përfshijnë emra të njohur, si: DJ Geek, Lyrical Son, MC Kresha, Elinel, Tuna, Argjentina Ramosaj, Ron, Lumi B dhe Buta. Në kopertinën e albumit, Dafina shfaqet në një lëndinë me qengja, teksa mban një prej tyre në dorë.
“Dedikuar një gruaje vërtetë shumë të veçantë, Melihate Zeqiri”, shkruhet në një rresht të nënvizuar në koopertinën e “Dafinë Moj”. Dafina ka njoftuar që të gjitha të ardhurat nga shitja e këtij albumi do të shkojnë në ndihmë të fëmijëve autikë. Albumi mund të blihet si kopje fizike në GjirafaMall, teksa mund të gjendet edhe online në platformat muzikore, përfshirë YouTube.