Damian Gjiknuri viziton serat e Shirgjanit në Elbasan: Bujqësi ka një të ardhme të garantuar

Zona e Shirgjanit në Elbasan është prodhuesi kryesor i prodhimeve bujqësore jo vetëm për tregun e Elbasanit, por edhe më gjerë. Sekretari i Përgjithshëm i PS Damian Gjiknuri i shoqëruar dhe nga Kryetari i Bashkisë Gledjan Llatja ishte në një prej serave të zonës, prodhimet e të cilave fermerët i dërgojnë në pikën e grumbullimit e më pas eksportohen drejt vendeve europiane.
Damian Gjiknuri, që është njëherësh dhe drejtues politik i qarkut Elbasan siguroi fermerët për mbështetjen e vazhdueshme nga ana e qeverisë me qëllim shtimin e prodhimit dhe gjetjen e tregjeve për shitjen e tyre.
“Sfida më e madhe e njerëzimit do të jenë kostot e shtuara të çmimeve. Kush merret me bujqësi ka një të ardhme të garantuar”, theksoi Gjiknuri.
Ndërsa kryebashkiaku Gledian Llatja theksoi se përmirësimi i infrastrukturës ka sjellë më pranë prodhimet bujqësore me tregjet, duke ndihmuar në këtë mënyrë gjithë ekonominë e zonës.
“Rruga ka qenë një nga problematikat kryesore që ka pasur zona. Me ndërtimin e rrugës brenda dy viteve pothuajse është dyfishuar numri i serave nga 30 hektarë në 70 hektarë”, u shpreh Kryetari i Bashkisë së Elbasanit.
Ndërtimi i unazës bujqësore ka krijuar lehtësi dhe i ka dhënë zhvillim gjithë zonës së Shirgjanit në Elbasan. Vitet e fundit disa kompani eksporti kanë shfaqur interes për prodhimet cilësore të zonës, ç’ka ka sjellë dhe rritje të prodhimit.