Këshilltari i lartë i Departamentit Amerikan të Shtetit, Derek Chollet në një intervistë për “Zërin e Amerikës”, thotë se udhëheqësit në Kosovë dhe Serbi duhet të marrin vendime të vështira dhe të tregojnë kuroja, në mënyrë që të lënë mënjanë ndasitë dhe të bëjnë atë që është në interesin e shteteve të tyre. Për të propozimi i Bashkimit Evropian për një marrëveshje të mundshme është në drejtim “të mire”.
“Nuk dua të merrem me detajet e asaj çfarë ka propozuar BE-ja. Mendoj se ndonjëherë, në çfarëdolloj negociatash, është më mirë që këto detaje të lihen pas dyerve të mbyllura, deri në momentin kur të jenë gati.
Mendojmë se BE-ja ka parashtruar një drejtim të arritshëm, një drejtim të mirë. Sërish, do të jetë e vështirë. Do të duhet shumë punë. Do të kërkohen vendime të vështira dhe kurajë nga udhëheqësit, që të lënë mënjanë ndasitë dhe të bëjnë atë që është në interesin më të mirë të vendeve të tyre”, u shpreh zyrtari i lartë amerikan.