Opozita ka vetëm një plan sipas njërit prej krerëve të partive të djathta. Kreu i LZHK-së, Dashamir Shehi është shprehur se protesta e opozitës së bashkuar do të zgjasë deri në rrëzimin e Ramës nga posti i kryeministrit dhe formimin e një qeverie tranzitore. Sipas tij, protesta gjithashtu është edhe një ‘barometër’ për të matur forcën e opozitës, katër muaj para zgjedhjeve lokale.
“Një plan kemi, planin A, të largojmë Edi Ramën. Do rezistojmë deri kur të largohet ky pastaj koha do të tregojë nëse jemi të fortë për ta bërë këtë punë apo…”, shprehet Shehi.
Lidhur me thirrjet e ndërkombëtarëve se opozita duhet ta zhvillojë betejën në Parlament, kreu i LZHK-së sqaron se detyra e opozitës është të jetë si në sallë ashtu edhe në krah të qytetarëve në rrugë. “Të huajt mos të shqetësohen fare. Ne jemi në parlament por ne do të shkojmë edhe në rrugë në këtë demonstratë”, përfundon Shehi, që nuk beson se do të përsëritet çadra, pasi marrëveshja e 18 majit sipas tij është një dështim i opozitës.