Kryetari i LZHK-së, Dashamir Shehi ka treguar në emisionin “Log.” formulën si opozita mund të bashkohet dhe të shkojë drejt fitores më 14 maj. Sipas Shehit, e gjithë opozita duhet të bashkohet rreth kandidatit për kryetar bashkie, duke marrë shembullin e kandidatit të Durrësit, Igli Cara.
Shehi u shpreh se të gjithë duhet të “hipim në tribunën e kandidatit” dhe mos shikojmë kush është kryetar partie.
“Unë gjykoj që kryetar i opozitës në Durrës është ai Igli Cara. Dhe nuk kam nevojë të merremi as me Berishën dhe as me ata të tjerët, rdhe nëse nuk bien dakord. Pse? Sepse kam Iglin. E kam të ri, të pa korruptuar, nuk ka punë Igli as me gjermanet as me amerikanet. I shkoj nga prapa Iglit. Unë i shkoj të martën, Berisha le ti shkojë të hënën. Kjo është formula po të duash të bashkosh.
Pastaj sa këshilltarë do marrë unë, me gjithë dështimet, gjykon populli. Po na dhanë vota do fusim më shumë këshilltarë. Të njëjtën gjë do bëjmë për Shkodrën, të shkojmë të puqemi pas atij personi. Unë gjykoj që kjo është formula” u shpreh Shehi.
Sipas tij, një tjetër formulë është që të sulmohet Edi Rama, duke denoncuar të gjithë zullumet e kësaj qeverie. Përveç kësaj tha ai, duhet edhe një program politik.
“Formula tjetër është që na bashkon kjo letra që kam shkruar, po të duam ta sulmojmë këtë zotërinë duhet të themi zullumet e këtij personi. A kemi 10 vjet që jemi jashtë Evropës? Vjet mezi morën gjysmë letre. A kemi 5 vjet që merremi me Open Balkan dhe nuk ka farë Open Balkan. Prishëm edhe një marrëveshje me Berlinin. Futëm një dyshim brenda komuniteti shqiptar, po kush i bëri këto? Ky zotëria i bëri, për interesat e veta. Të bëjë një lloj marrëdhënien preferenciale dhe personale, kjo bëhet që ky të lartësohet. Në këto do godasim. Unë them se këtë punë e bëj mirë, disave nuk u pëlqen, po punë e madhe.
Duhet të hipim tek tribuna e kandidatit, sepse ata na bashkojnë.
Nuk mjafton vetëm ta kritikojmë Ramën, do afrojmë edhe ne diçka tjetër. Do ofrojmë një program, do unifikojmë mendimet tona. Do i ofrojmë një skemë tjetër rinisë që mos ikë. Do ti ofrojmë edhe një perspektivë përfaqësimi politike”. – u shpreh Shehi.