Shpërthimi i zjarrit në një dasmë në Irak që vrau më shumë se 100 të ftuar ka shkaktuar tronditje të thellë te çifti i të rinjve, Revan dhe Haneen.
Revan tha se ai humbi 15 anëtarë të familjes së tij në zjarr, duke shtuar se nusja e tij “nuk mund të flasë” pas humbjes së 10 të afërmve të saj, përfshirë nënën dhe vëllanë e saj. Në gjendje kritike është edhe babai i saj.
“Është e vërtetë që ne jemi ulur këtu përballë jush të gjallë. Por brenda ne kemi vdekur. Jemi të mpirë. Ne jemi të vdekur brenda”, tha ai në një intervistë për “Sky News”.
E gjitha ndodhi gjatë kërcimit, tha ai, ndodhi një ndërprerje e energjisë – dhe kur u kthye rryma ai “pa zjarr” në tavan.
Pikërisht atëherë njerëzit filluan të “ulërinin” dhe të “iknin”.
“Unë e kapa gruan time dhe fillova ta tërhiqja zvarrë. Vazhdova ta tërhiqja zvarrë dhe të përpiqesha ta nxirrja nga hyrja e kuzhinës”, rrëfeu ai.
“Ne nuk mund të jetojmë më këtu. Nuk mund të jetojmë më këtu. Domethënë sa herë që përpiqemi të kemi pak lumturi, na ndodh diçka tragjike dhe na e shkatërron lumturinë. Pra, është më mirë që ne të largohemi”, shtoi Revan.