Mbledhja e komisionit të ligjeve është shoqëruar me debate mes deputetëve demokratë dhe kryetares së komisionit të ligjeve, Klotilda Bushka. Deputetët e PD-së kërkuan që Zonja Bushka të mos drejtojë mbledhjen e komisionit deri në sqarimin e situatës.
Dashnor Sula: Ju Zonja kryetare s’duhet të ishit këtu. Ngjarja e djeshme e arrestimit të Kryetarit të Bashkisë së Tiranës ka sjellë një situatë të re edhe në komisionin e ligjeve. Nuk do të ishte e ndershme që ju të drejtoni komisionin e ligjeve në një kohë që del nga deklarata e SPAK që ju keni penguar drejtësinë. Komisionin sot duhet ta drejtojë Zonja Çupi se ju s’keni moral ta drejtoni.
Klotilda Bushka: Ky është komision i ligjeve jo komision hetimor. Sqarimet do t’i jap aty ku duhen dhënë.
Një ditë më parë në njoftimin e SPAK për dosjen e kryetarit të bashkisë së Tiranës përmendej edhe deputetja Klotilda Bushka.
“Përveç sa është përmendur mësipër, Prokuroria e Posaçme po kryen hetime paraprake ndaj deputetes së Kuvendit të Shqipërisë, shtetases K. B. Emri i kësaj të fundit është regjistruar në regjistrin përkatës të njoftimeve si person i dyshuar për kryerjen e veprës penale të “Veprime që pengojnë zbulimin e së vërtetës”, parashikuar nga neni 301 i Kodit Penal. Deri në këtë fazë konstatohet se ekzistojnë të dhëna konkrete të cilat të çojnë tek dyshimi i arsyeshëm se personi nën hetim K. B. ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal nr. 27 të vitit 2024.” Shkruhej në njoftimin e SPAK.