E ka përjetuar mjaft keq humbjen e motrës së tij, vëllai i Brisilda Gjikolës, vajzës që u vra një natë më parë në Tiranë. Vëllai i ka dedituar një mesazh mjaft prekës motrës 17-vjecare.
Në një postim në Instagram ai shkruan: “Nuk e prisja që të kisha një humbje tjetër aq të thellë. Mendova se do të kalonim një jetë plot kujtime që më marrin frymën dalëngadalë. Do t’më mbetesh plagë në zemër gjithë jetën”. Mësohet se maturantja jetonte në një shtëpi me qira me vëllanë e saj më të vogël në Zonën e Laprakës, pranë Spitalit të Traumës, ndërsa prindërit pas ndarjes ishin larguar, nëna në Itali e babai në Mirditë. Mbrëmjen e djeshme, ndërsa ndodhej në makinë me Bengën, rreth orës 18:10, një person i ka qëlluar të dy me breshëri plumbash. Autori i ngjarjes i cili është shpallur në kërkim nga policia, dyshohet të jetë Robert P. 19 vjeç, nga Tropoja, ndërsa mësohet se ai ka gjuajtur në xhamin e pasëm të makinës, në drejtim të shoferit, i cili mendohet se ka qenë dhe objektivi i tij, por plumbat kanë prekur edhe të renë.
Brisilda nuk mundi t’u mbijetonte plagëve dhe ndërroi jetë gjatë transportit për në spital, ndërsa i dashuri i saj, me të cilin thuhet se kishte vetëm pak kohë në lidhje, u plagos por tashmë ndodhet jashtë rrezikut për jetën. Mbrëmjen e djeshme ka qenë vetë Benga i cili edhe pse i plagosur ka drejtuar mjetin dhe ka shkuar bashkë me vajzën në Spitalin e Traumës. Nga informacionet e mbledhura deri më tani, mësohet se dy të rinjtë ishin konfliktuar fizikisht edhe në dy raste të tjera, ndërsa dyshohet se shkak është bërë 17-vjeçarja, së cilës i kishte propozuar edhe autori i dyshuar. / P. Hasa /