Shqipëria nuk arriti dot të prekte finalen e Eurovizionit këtë vit duke u eleminuar që në natën gjysmëfinale të festivalit. Vendi ynë u përfaqësua nga këngëtarja Ronela Hajati me këngën e titulluar “Sekret” e cila u pëlqye shumë nga publiku ndërkombëtar, megjithatë kjo nuk mjaftoi për të shkuar më tej.
Rezultatet tregojnë se pavarësisht se kjo këngë ka pasur përkrahje nga publiku, ajo nuk ka arritur të bindë aspak juritë profesionale.
Eurovision ka publikuar rezultatet e të gjitha gjysmëfinaleve pasi ka përfunduar finalja. Shqipëria në gjysmëfinalen e parë nga 17 shtete ka dalë e dymbëdhjeta me vota. Dhjetë shtetet e para kanë shkuar tutje.
Nga juritë e gjysmëfinalistëve, Shqipëria ka arritur të marrë pikë vetëm nga Greqia, edhe pse 12 gjithsej. Asnjë juri e asnjë shteti tjetër nuk i ka dhënë pikë Shqipërisë.
Ndërsa nga publiku i natës së parë, Zvicra i ka dhënë 8 pikë, Sllovenia 6, Bullgaria 1, Kroacia 2 pikë, Austria 2 pikë, Greqia 12 pikë, Armenia 2 pikë, Franca 5 pikë dhe Italia 8 pikë. Kështu, në total Shqipëria ka marrë 58 pikë, të pamjaftueshme këto për kualifikim në finale.
