Ish-zv / ministri i Drejtësisë Arben Isaraj ka analizuar nëse kryeministri ka të drejtë ose jo t’ia delegojë kompetencën si ministër për Evropën dhe Politikën e Jashtme, Genti Cakajt.
Analiza
Në Shqipëri organet administrative e delegojnë kompetencën e tyre tek një organ tjetër administrativ apo tek organet e tyre të varësisë, jo sipas Kushtetutës por sipas Ligjit.
Nëse në procedurën e tij administrative, qëllon që Ministri e delegon kompetencën e tij në kundërshtim me Ligjin, kjo nuk do të thotë se ai “SHKELI KUSHTETUTËN”.
Çdo shkelje njerëzore nuk është shkelje kushtetuese.
E drejta e lëvizjes lirisht në territor, është e drejtë kushtetuese, por shkelja e këmbës së një njeriu që ecën lirisht, nuk është SHKELJE E KUSHTETUTËS.
Sipas neneve 27 e vijues të Kodit të Procedurave Administrative në fuqi në Republikën Shqipërisë, Ministri (organi epror) ia delegon kompetencat e tij Zëvendësministrit (organi vartës).
Në këto raste ligjore delegimi, Ministri përcakton me Urdhër, kompetencat të cilat janë deleguar ose tregon se çfarë aktesh mund të nxjerrin apo zbatojnë organet e deleguara.
Kjo është një procedurë administrative e shpeshtë dhe rëndomtë e cila gjendet lehtësisht e botuar në Fletoret Zyrtare të Republikës së Shqipërisë.
Aq “baltë” është bërë, sa në Fletoret Zyrtare të Shqipërisë do të gjeni dhe rastin kur Ministri i (organi delegues), në shkelje të pikave 1 dhe 2, neni 27 i Kodit të Procedurave Administrative,nuk ia ka deleguar kompetencën e tij ligjore, as organit administrativ të varësisë dhe as një organi tjetër të administratës, por …. “Dhomës”, “Korridorit”, “Aneksit”, apo “Tualetit”, që nuk kanë gëzuar statusin e organit administrativ apo entit publik (emëruar, financuar dhe kontrolluar nga Legjslativi apo Ekzekutivi) sipas legjislacionit në fuqi në Republikën e Shqipërisë.