Shqiptarja, Bleona Tafallari e cila u arrestua dy vite më parë në Itali, pasi akuzohej për vepra terroriste, është dënuar me 4 vite vite vite burg nga Apeli në Milano.
Mediat vendase shkruajnë se e reja shqiptare ishte anëtare në shoqatën terroriste “Luanët e Ballkanit”.
Ajo ishte e martuar me Përparim Veliçin (21 vjeç), një ushtar i ISIS, po ashtu kosovar me banim në Gjermani. Burri me të cilin kishte krijuar lidhje së fundmi betohej për xhihadin dhe kishte kontakt me bombarduesin e Vjenës, sulmi terrorist i të cilit la pas 4 të vdekur dhe 23 të plagosur.
Në Shkallën e Parë, Tafallari me origjinë nga Kosova ishte dënuar me tre vjet e katër muaj burg pasi akuzohej për nxitje për kryerjen e një krimi, për shkak të presionit që ushtronte ndaj disa vajzave të reja për t’u martuar me xhihadistë.
E radikalizuar që në moshën 16-vjeçare (tani 21-vjeçe) Tafallari (e cila kishte jetuar më parë në Itali), kur u arrestua në Padova tha se ishte kthyer në Milano nga vëllai i saj për të rinovuar kartën e identitetit dhe për t’iu nënshtruar vaksinimit anticovid.
Hetuesit kishin gjetur disa imazhe dhe dokumente mbi terrorizmin dhe “luftën kundër të pafeve” në telefonin e shqiptares, ku përfshiheshin edhe disa udhëzime për paketimin e bombave.
Ndër fotografitë e gjetura, ishte ajo e një të porsalinduri me një armë të mbështetur në bark dhe një kapele me një shehadet (dëshmia me të cilën muslimanët deklarojnë besimin e tyre në një Zot të vetëm dhe në profetin Muhamed), me shenjën që tregon se fëmija ishte tashmë i destinuar për martirizim.
Mesazhet e saj në “Telegram”, gjithashtu ishin të mbushura me emoj me flamurin e zi të ISIS-it dhe imazhe dhe video të prerjeve të kokave dhe mizorive të ndryshme të kryera nga ndjekësit e Kalifatit.
Dhe “miqtë” e saj, të gjithë kosovarë, shfaqnin dëshirën për të luftuar në Siri. Bleona shoqërohej me vajza dhe gra, me të cilat pavarësisht moshës së saj shumë të re, nuk hezitoi t’i këshillonte, t’i bindte apo t’i qortonte, nëse nuk i zbatonin urdhëresat fetare.