Deputeti i Partisë Socialiste, Adnor Shameti, është shprehur se nuk ka bësim që të gjendet gjuha e përbashkët në Këshillin Politik dhe të arrihet një marrëveshje e re politike mes palëve.
Në një intervistë në emisionin “Fokus” në TVT, Shameti tha se nuk ka gjasë që të gjendet gjuha e përbashkët me opozitën e bashkuar për ndryshimet kushtetuese. Sipas tij çdo mundësi është shuar sot në Këshillin Politik dhe shtoi se ndryshimet kushtetuese do votohen me 30 korrik.
“Unë mendoj se takimi i sotëm i Këshillit Politik i ka ezauruar të gjitha çështjet dhe nuk na mbetët gjë tjetër veçse të miratojmë ndryshimet kushtetuese me opozitën parlamentare. Pa votat e tyre nuk mund të miratohej as marrëveshja e 5 qershorit”, tha ai.
Ndërkohë lidhur me deklaratën e Meta që kërkoi nga PS heqjen dorë të ndryshimet të kushtetutës në mënyrë të njëanshme deputeti Shameti deklaroi se Presidenti nuk ka fuqi që të mos i miratojë ndryshimet.
“Nuk ka asnjë tagër presidenti të mos miratojë ndryshimet kushtetuese sepse ai mund të kthejë vetëm ligje të thjeshta. Ata janë në bllok dhe presidenti është i detyruar t’i zbatojë”, tha Shameti.