Anëtari i Komisionit të Ligjeve Adnor Shametaj ka deklaruar në studion e emisionit “5 pyetje nga Babaramo” se pas dy ditësh do të propozojë në këtë komision nismën për zhbllokimin e betimit të magjistratëve. Shameti tha se sipas propozimit të tij, betimi i magjsitratëve në rast refuzimi nga ana e presidentit do të bëhet me shkrim.
“Jo më vonë se pasnesër në Komisionin e Ligjeve shqyrtojmë nisëm tjetër ku iniciues jam unë bashkë me Hysenin dhe Lekën me dy ndërhyrje. E para është zgjidhja e ngërçit zhbllokues për betimin e magjistratëve para presidentit.
Zgjidhja është në disa plane. Prokurori i Përgjithshëm e bën betimin para parlamentit, por ne propozojmë që ta bëjë para trupës gjyqësore ose me akt të shkruar. Në kushtet e mungesës së vullnetit nga ana e presidentit të ketë elementë zhbllokues. Nëse presidenti nuk e ushtron të drejtën për të organizuar ceremoninë e betimit, ai mund ta bëjë me shkrim dhe kjo të konsiderohet si akti i betimit”, deklaroi Shameti.
Përplasja institucionale me presidencës dhe mazhorancën në Kuvend lidhur me emërimin e Arta Vorpsit në “Kushtetuese”, bëri që kjo e fundit të shohë nevojën për të marrë masa të tjera ligjore apo mekanizma zhbllokues për situata të ngjashme si ajo me Gjykatën Kushtetuese dhe emërimin e anëtarëve të saj.
Shameti përmendi edhe nismën e dytë që do të prezantohet në Komisionin e Ligjeve pas dy ditësh, të quajtur si Anti-KÇK-ja e dytë.
“E dyta ka të bëjë me miratimin e strukturës së ILD-së. E reja që ne kemi kërkuar ka të bëjë me atë që për një periudhë tranzitore 6-mujore derisa të formohet struktura e ILD-së ta ketë KLP dhe KLGJ përmes magjistratëve të caktuar nga ana e tyre. Si dhe pezullimin e një magjistrati brenda 3 ditësh kur kapet me probleme. E reja është masa e pezullimit të menjëhershëm të magjistratit”, tha Shameti