Sherr me britma dhe sende në parlamentin e Gjeorgjisë.
Mediat e huaja raportojnë se një deputete goditi sot kolegun e saj me një shishe uji. Debati në kuvendin e Gjeorgjisë nisi për shkak të çështjes për “agjentët e huaj”, e cila ka shkaktuar polemika në vend.
Në videon e publikuar në rrjetet sociale duket deputetja e cila godet në kokë kolegun e saj me shishen e ujit, mendohet se është shishe plastike.
Ndërkohë ky i fundit i bërtet dhe i drejton gishtin. Kohët e fundit në Gjeorgji kanë shpërthyer protesta dhe tubime lidhur me “agjentët e huaj”.
Projektligji që ka shkatuar polemika kërkon që organizatat që marrin më shumë se 20 për qind të financimit të tyre nga jashtë, të regjistrohen si “agjentë të huaj”.
Kundërshtarët e projektligjit e quajnë këtë ligj autoritar dhe “të frymëzuar nga Rusia”, por partia në pushtet Ëndrra Gjeorgjiane thotë se është e nevojshme të sigurohet transparencë në financimin e organizatave joqeveritare.
Bashkimi Evropian ka thënë vazhdimisht se projektligji rrezikon rrugën e Gjeorgjisë drejt anëtarësimit në BE.
Në një deklaratë të shpërndarë më herët gjatë këtij muaji, Shefi i Politikës së Jashtme të Bashkimit Europian, Josep Borrel tha se miratimi i projekligjit do të kishte pasoja negative mbi rrugën integruese të Gjeorgjisë.
Edhe pse Presidentja e Gjerogjisë Salome Zourabichvili pritet të vendosë veton ndaj projektligjit në rast se miratohet nga Parlamenti, partia në pushtet mund ta rrëzojë atë nëse mbledh 76 vota. Pas këtij akti, kryetari i parlamentit mund të firmosë miratimin e ligjit.
Ndërkohë zëdhënësi i presidentit rus Vladimir Putin ka thënë se Moska nuk ka asnjë lidhje me projektligjin.