Deputetja e Kuvendit të Shqipërisë Aurora Mara dhe kryetari i bashkisë Mat Agron Malaj që në të gdhirë të ditës së sotme po ndjekin nga afër situatën e krijuar nga tërmetet e fundit.
Në mëngjes herët dhe pasdite ata kanë drejtuar mbledhjen e shtabit të emergjencave civile në këtë rreth. Mësohet se fatmirësisht nuk ka viktima në njerëz, megjithëse lëkundjet kanë qenë mjaft të mëdha.
Drejtori i emergjencave Nezir Sinani bëri me dije se në bashkitë Mat e Klos janë konstatuar 180 banesa të dëmtuara lehtë ndërkohë që 6 prej tyre janë aktualisht të pabanueshme. Janë ngritur dhe funksionojnë në çdo njësi administrative komisionet e verifikimit, konstatimit dhe vlerësimit të dëmeve të shkaktuara. Po ashtu janë dëmtuar pjesërisht tri objekte arsimore dhe një qendër shëndetësore në Xibër.
Malaj e Mara theksuan se është shumë e rëndësishme të jemi solidarë në këto momente të vështira dhe t’u gjendemi pranë qytetarëve në nevojë. Të gjithë drejtuesit vendor duhet të angazhohen seriozisht deri në kapërcimin e situatës së pazakontë. /tirananews.al/





