Ne jemi përgjegjës për të lënë një Union më të fortë se ai që kemi trashëguar, deklaroi sot kryetarja e re e Komisionit Europian, Ursula von der Leyen me rastin e 10-vjetorit të nënshkrimit të Traktatit të Lisbonës.
”Europa është thesari që kemi trashëguar. Një kontinent në paqe me të drejtat, liritë, tregun e përbashkët unik, me mundësi të pashembullta ekonomike dhe është detyra jonë për ta ruajtur këtë thesar”, theksoi ajo në muzeun ”’Shtëpia e Historisë Europiane” në Bruksel.
“Unë besoj se nuk mund të ketë një ditë më të mirë për të filluar punën sesa ky përvjetor. Ne jemi kujdestarët e traktateve dhe në një kuptim të caktuar engjëjt mbrojtës të parimeve të Lisbonës”, tha Der Leyen, në daljen e parë si shefe e ekzekutivit të ri.
”Europa nuk është thjesht një thesar i trashëguar, është një premtim, një e ardhme, diçka për të cilën duhet ta ndërtojmë tullë pas tulle, ditë për ditë”, shtoi ajo.