Të nesërmen në orën 18:30 Tirana dhe Partizani përballen në Air Albania në ndeshjen kyç për titullin kampion të Kategorisë Superiore. Lidhur me këtë ndeshje që pritet me mjaft entuziazëm nga fansat e shumtë të të dyja skuadrave, policia ka njoftuar masat e marra.
Përveç një perimetri sigurie në stadium, duke nisur nga ora 16:00, për të shmangur rrëmujat e mundshme që mund të krijohen, policia ka njoftuar bllokimin e disa rrugëve ku mund të lëvizin tifozët e dy skuadrave.
Rrugët të cilët do të jenë të bllokuara nga ora 16:00 deri në përfundimin e ndeshjes ‘derbi’:
– Rruga “Lek Dukagjini”, përreth stadiumit, rruga “Dervish Hima”, rruga “Gjergj Filipi”, rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” , bulevardi “Dëshmorët e Kombit”, nga Presidenca deri te sheshi “Nënë Tereza”.
Rrugëkalimet e tifozëve do të jenë si më poshtë:
– Lëvizja e tifozëve të Partizanit do të bëhet nga kryqëzimi i rrugës “Muhamet Gjollesha” me rrugën “Artan Lenja”, përgjatë rrugës “Muhamet Gjollesha”, rruga “Sulejman Delvina”, “Libri Universitar” pas Presidencës rruga “Gjergj Filipi” – stadiumi;
– Lëvizja e tifozëve të Tiranës do të bëhet nga sheshi “Skënderbej”, bulevardi “Dëshmorët e Kombit, rruga “Bajram Curri”, rruga “Papa “Gjon Pali” – stadiumi.
Në hyrje të stadiumit tifozët do të kontrollohen për sende të kundërligjshme (sende të forta, bidonë uji, çadra, çelësa metalik apo lëndë piroteknike etj). Ndërkohë personat pa kartë identiteti dhe ata nën moshën 16 vjeç, nuk do lejohen të hyjnë në stadium pa praninë e prindit.
Po ashtu nuk do t’u lejohet hyrja në stadium tifozëve të përcaktuar si problematikë nga ana e policisë.