I plagosuri nga sulmi me armë 3 ditë më parë në Laprakë, Erjon Benga, ka dhënë dëshminë e tij për oficerët e Policisë Gjyqësore, në ambientet e Spitalit të Traumës. 23-vjeçari mori plumba në qafë dhe shpatull, kurse Griselda Gjikola humbi jetën. Vetë I plagosuri mohoi që të ketë pasur lidhje dashurie me viktimën, duke thënë se e kishte njohur përmes një shoqes së tij dhe ishin ulur për të pirë kafe.
Ndërsa shpjegoi se në momentin që është qëlluar me armë drejt makinës së tij, ai sapo kishte dalë nga kafja pranë vendit të ngjarjes dhe do të dërgonte në shtëpi 17- vjeçaren Gjikola.
Nga ana tjetër ka thënë se nuk ka parë se kush e ka qëlluar, pasi përveç errësirës në atë zonë, është gjendur në befasi, duke qenë se nuk e priste një sulm të tillë, për më tepër që i ka ardhur nga pas.
I pyetur nëse e njeh personin e dyshuar, të shpallur në kërkim për ngjarjen, ai ka deklaruar se në dy raste ka pasur konflikte me të, por pa dhënë detaje për motivet e sherrit.