Lajmi se një vajzë rreth 13 vjeç ishte rrëmbyer në mes të ditës tronditi gjithë opinionin publik ditën e djeshme.
Në një deklaratë për mediat, vetë drejtuesi i Policisë për Tiranën do të sqaronte se nuk bëhej fjalë për një rrëmbim, por për një histori adoleshentësh dhe vajza ishte larguar vetë për të pirë kafe me shoqërinë e saj. Por kjo deklaratë e policisë bie ndesh me deklaratën paraprake të policisë e cila thoshte se dyshohej se 13-vjeçarja ishte rrëmbyer. Kjo ngriti edhe më tej dyshimet e forta lidhur me ngjarjen. Sipas dëshmisë së gjyshes së vajzës në polici, ajo ka treguar se vajza është rrëmbyer nga dy persona me maska dhe me një makinë të kuqe dhe sa ajo e kishte parë vetë rrëmbimin. Por vajza u gjet në Ring Center dhe ka qenë ajo që i ka kërkuar ndihmë rojeve të sigurisë së kësaj qendre për të komunikuar me prindërit.
Dëshmitarët okular kanë treguar se vajza ka qenë e frikësuar në momentin që ka kërkuar ndihmë, çka ngre dyshime nëse ishte vërtet një inskenim i vajzës apo ajo është rrëmbyer vërtetë dhe nën kërcënim është detyruar që të japë këtë version?!
Sipas policisë vajza ka qenë me disa shoqe duke pirë kafe. Por si është e mundur që disa vajza vetëm 13 vjeçe të sajojnë një histori si në filma me rrëmbim nga dy persona me maska dhe gjyshja që ka parë gjithë ngjarjen?! Pse pikërisht denoncimi u bë për këtë vajzë dhe jo për shoqet e tjera të vajzës që sipas policisë po e shoqëronin?