Dalin detaje të reja nga vrasja e ndodhur mbrëmjen e së enjtes në lagjen “Erdogan” të qytetit të Laçit, ku humbi jetën 40-vjeçari Ilir Gjini.
Sipas burimeve, Gjini, i njohur edhe me mbiemrat Kokaj, Lika dhe Nure, ka qenë në këmbë dhe po i drejtohej hyrjes së pallatit ku banonte në momentin kur është qëlluar me shtatë plumba.
Policia ka identifikuar dhe shpallur në kërkim autorin e dyshuar të krimit, Emiljan Suti, alias Artur Suti. Sipas të dhënave paraprake, ai ka hapur zjarr menjëherë pasi viktima kishte parkuar automjetin. Edhe pse 40-vjeçari ka tentuar të largohej, autori dyshohet se e ka ndjekur dhe e ka qëlluar sërish pranë hyrjes së godinës.
Sipas raportimit, i plagosur rëndë, Gjini është transportuar me urgjencë drejt spitalit, por nuk ka mundur t’u mbijetojë plagëve të marra dhe ka ndërruar jetë gjatë rrugës.
Burime nga hetimi bëjnë me dije se viktima dhe autori i dyshuar ishin fqinj, pasi banonin në të njëjtën lagje. Në kuadër të veprimeve hetimore, në Komisariat janë shoqëruar nëna dhe vëllai i autorit të dyshuar, ndërsa kontrollet për lokalizimin dhe kapjen e tij vijojnë.
Policia po heton disa pista lidhur me motivin e ngjarjes, përfshirë edhe të shkuarën e viktimës jashtë vendit. Sipas burimeve nga grupi hetimor, 40-vjeçari kishte gjithashtu precedentë penalë.