Të shtëna me armë zjarri janë regjistruar këtë të mërkurë në Fushë Kuqe të Kurbinit. Në shënjestër ka qenë ish-deputeti i Partisë Socialiste Armando Prenga.
Autoritetet policore bëjnë me dije se shtetasi F. I., 29 vjeç, ka qëlluar me armë zjarri pistoletë në drejtim të automjetit të ish-deputetit. Më pas, autori është larguar me një automjet tip “Benz” dhe është shpallur në kërkim nga Policia. Fatmirësisht nga të shtënat nuk ka patur persona të lënduar.
Burime bëjnë me dije se ngjarja e ka zanafillën tek një konflikt gjatë numërimit të votave në KZAZ 15 Kurbin, ku u përplasën vëzhguesit mes të cilëve ishte dhe babai i autorit.
Armando Prenga ka qenë për dy legjislatura deputet i PS-së, deri sa e dorëzoi vetë mandatin, pas shumë kërkesave të PD-së. Më herët ai edhe është arrestuar nga Policia. Gjithashtu, Armando Prenga ka qenë i dënuar në Itali dhe ka përdorur gjithsej 10 identitete të ndryshme.
Ai ka qenë i akuzuar ne vitin 1996 ne Milano për akuzat e vjedhjes së pasurisë, falsifikimit të identitetit dhe krime kundër pronës dhe njihej si Mondi Prenga. Po sipas dosjes se hartuar nga autoritetet italiane Mondi Prenga rezulton të kishte dhe emrat si Mondi Prenga Ardian Ndoka, Mond Gjoni, Gjoni Don, Arjan Ndoci, Arjan Noc, Arjan Ndoci, Arjan Noci, Mondj Prenga dhe Mondi Prenga.