231.921 emigrantë janë regjistruar për të votuar në zgjedhjet parlamentare të 11 majit. KQZ ka në shqyrtim edhe 20.465 kërkesa të cilat nuk janë pranuar ende.
Kërkesat më të mëdha për regjistrim janë nga Italia 40.6%, Greqia 28.3%, Gjermania 10% dhe SHBA 6.6%. Afati i regjistrimit të emigrantëve për pjesëmarrjen e zgjedhjeve parlamentare të 11 majit 2025 përfundoi një ditë më parë.
Kërkesa për shtyrja e afatit të regjistrimit në platformën PER për shtetasit shqiptarë që jetojnë jashtë vendit, duke e mundësuar këtë vetëm për ata që aktualisht janë regjistruar si aplikantë të refuzuar në sistem u miratua disa ditë më parë.
Sipas parashikimeve të Kodit Zgjedhor, votat e diasporës do të përllogariten në zonat zgjedhore ku figurojnë të regjistruar dhe qarku me numrin më të madh të kërkesave të aprovuara e ka Tirana me rreth 49 mijë, ndjekur nga Fieri me rreth 30 mijë e Durrësi me rreth 23 760. Qarku me numrin më të ulët e ka Kukësi me 3 750 votues të regjistruar.
Sipas afateve të Kodit Zgjedhor, KQZ brenda datës 9 mars duhet të publikojë listën finale të zgjedhësve, dhe në datën 12 dorëzohen kandidatët për deputetë.