850 fermerë të bashkive Mat, Klos, Bulqizë e Dibër përfitojnë naftë falas nga skemat mbështetëse të qeverisë shqiptare. Ky program ka nisur nga 1 janari 2021 për të gjithë fermerët që përdorin mjete të motorizuara për të punuar tokën. Programi funksionon me një mesatare të përllogaritur të konsumit të traktorit dhe mjeteve të tjera të rënda për punimin e një hektari tokë sipas secilës kulturë të mbjellë.
Sot në bashkinë e Matit, në prani të kryebashkiakut Agron Malaj, nënprefektit Hasan Pasha, përgjegjësit të ekstensionit për Qarkun e Dibrës, Qatip Doda, u shpërndanë për fermerët përfitues kartat e karburantit falas.
Malaj dhe Doda bënë me dije se të tjerë fermerë duhet të aplikojnë për të përfituar subvecione nga qeveria. Ata u shprehën se kjo është një ndihmë e madhe për fermerët që kultivojnë bimë arash, perime, pemë frutore, etj.