Të shumtë janë njerëzit, sidomos të vegjëlit, që i gëzohen dëborës. Kënaqen pafund dhe nuk hezitojnë të pozojnë e luajnë me topa bore. Madje shumëkush e konsideron si fat rënien e saj. Është më se e vërtetë se sasitë e mëdha mundësojnë shtimin e prurjeve në liqenit e hidrocentraleve, shtojnë sasinë në burimeve të ujit të pijshëm, përmirësojnë infrastrukturën e tokës, etj.
Por jo pak probleme shkakton rënia e saj për lëvizjen normale të qytetarëve. Dëbora e ditës së sotme tregoi se bashkitë e Qarkut të Dibrës, nga Peshkopia në Burrel nuk ishin mirëpërgatitur për ta përballuar situatën. Rrugët, trotuaret, sheshet mbetën gjatë gjithë ditës nën pushtetin e dëborës. Katër bashkitë ngritën supet e nuk hodhën kripë apo skorie në rrugë. Lëvizja e qytetarëve, sidomos fëmijëve dhe të moshuarve ishte gati e pamundur.
Probleme serioze u krijuan edhe në rrugën nacionale Milot-Peshkopi. Firma që ka fituar tenderin për mirëmbajtjen e këtij aksi të rëndësishëm nuk e mbajti në gatishmëri atë. Në Qafë Ulëz, Qafë Bualli, Maqellarë vargu i makinave të bllokuara ishte i gjatë.