Nga Qarku i Dibrës kanë nisur analizat vjetore të punës në 12 prefekturat e vendit. Mbledhja u hap me prezantimin e një raporti të detajuar nga stafi i Prefektit të Qarkut Dibër, Nexhbedin Shehu, ku u pasqyrua puna e institucionit të Prefektit, nënprefekturave të Bulqizës dhe Matit, si dhe e të gjithë sektorëve përkatës.
Në analizë ishte e pranishme edhe zëvendësministrja e Brendshme, Silva Caka, e cila vlerësoi punën e bërë gjatë vitit 2025, duke falënderuar Prefektin Shehu, nënprefektët Muliu dhe Pasha, sekretaren e përgjithshme Hysenaj si dhe drejtuesit e sektorëve.
Caka kërkoi më shumë kontroll mbi vendimet e këshillave bashkiakë, vëmendje të shtuar për parandalimin e emergjencave civile, si dhe bashkëpunim të ngushtë ndërinstitucional për parandalimin e kultivimit të bimëve narkotike.
Ajo theksoi gjithashtu rëndësinë e forcimit të bashkëpunimit me Policinë e Shtetit për sigurinë në shkolla dhe disiplinimin e trafikut, rritjen e grumbullimit të taksave vendore dhe një kontroll më rigoroz të fondeve buxhetore.
