Prefekti i Qarkut Dibër Nexhbedin Shehu dhe kryetarët e bashkive Mat, Klos, Bulqizë e Dibër, Agron Malaj, Ilmi Hoxha, Lefter Alla e Shkëlqim Murrja, drejtuesit e arsimit në katër njësitë vendore dhe nënprefektit e Matit e Bulqizës, Hasan Pasha e Avni Muliu kanë diskutuar sot në lidhje me gjendjen e objekteve shkollore në prag të fillimit të vitit të ri akademik.
Shehu kërkoi nga të zgjedhurit vendor dhe të emëruarit në krye të zyrave arsimore të marrin të gjitha masat e nevojshme për fillimin e vitit të ri shkollor. Gjatë ditëve të mbetura, tha ai, duhet t’u krijohen kushte normale të gjithë nxënësve dhe mësuesve.
Kryetari i Bashkisë Mat Agron Malaj tha se 40 objektet arsimore në Mat janë në gjendje normale falë ndërhyrjes nga bashkia me investime. Po ashtu janë siguruar detergjentë dhe materiale mbrojtëse kundër pandemisë.
Kryebashkiaku i Klosit shprehu shqetësimin se shkolla e Suçit është jashtë kushteve teknike dhe se mbi 200 nxënës nuk pranojnë të frekuentojnë objektet e siguruara nga pushteti lokal.
Drejtuesit e bashkive Bulqizë e Dibër nënvizuan se mbetet problem ngrohja në disa shkolla dhe se disa drejtorë nuk tregojnë kujdesin e duhur për mirëmbajtjen e objekteve të ndërtuara vitet e fundit.