Presidenti i SHBA, Joe Biden u shpreh se demokracia në Amerikë po kërcënohet nga mbështetësit e Donald Trump.
“Diçka e rrezikshme po ndodh në Amerikë tani. Kemi një lëvizje ekstremiste që nuk ndan bindjet themelore në demokracinë tonë. Ajo është lëvizja MAGA. Jo çdo Republikan, madje as një mazhorancë e republikanëve, nuk aderojnë në ideologjinë ekstremiste të MAGA-s”, theksoi ai.
Akuzën e tij, Biden e mbrojti duke pretenduar se kjo forcë politike po sulmon shtypin e lirë me portretizimin e tij si armik i popullit, po sulmon sundimin e ligjit dhe po ushtron presion ndaj votuesve. Këto deklarata i bëri gjatë një eventi në Arizona në përkujtim të trashëgimisë dhe kontributit të senatorit republikan, John McCain.
Gjatë fjalimit, Biden u ndërpre në një moment nga disa protestues që kërkonin shpalljen e emergjencës për klimën. Presidenti humbi durimin, duke iu kërkuar të mbanin qetësi dhe u premtoi se do të bisedonte me ta pas eventit.